Para rematar a semana en Thurles seguimos a ter como máxima a tan coñecida mens sana in corpore sano, só que algunhas exercitamos a mens e outras o corpore 😉
As mozas do Coláiste Mhuire e os mozos do CBS volveron sacar a artista que levan dentro nas aulas de arts and crafts. Esta vez usaron a técnica do zentangle e non vexades a de cousas chulas que fixeron! Coa axuda dun espello debuxaron as súas siluetas… et voilá:
Algunhas mesmo probaron a tatuarse as mans. Tranquilas, nais e pais, que foi con boli!
Mentres, no Presentation, as rapazas seguiron a poñerse en forma. O xoves disfrutaron no ximnasio, unha das súas actividades favoritas.
E o venres… fútbol gaélico! A pesar de que en Galicia temos a nosa propia asociación e de que o noso equipo triunfa alá onde vai, temos que recoñecer que nós non somos unhas expertas no tema… polo de agora! A nosa adestradora deunos as nocións básicas e a práctica non se nos deu nada mal!
Seguiremos a mellorar para vos sorprender ao chegar a Vigo!
Bicos, familias!
