Ola, Familias!
Hoxe foi un día moi longo. Erguémonos moi cedo, preparámonos e puxemos rumbo aos nosos respectivos coles. Algúns camiñando, outros en bus, outros en taxi… algúns máis cedo e outros non tanto, pero o importante é que chegamos! 🙂
Como xa sabedes, 17 estudantes estarán facendo a súa integración no Cheney School, mentres que 5 deles a farán no St. Gregory School. Neste último eran bastante estritos co tema dos móbiles (incluidas as monitoras), polo que non foi posible sacar fotos aquí. Prometemos que o luns poderedes ver esas fotos 🙁
Recibíronnos nas escolas cos brazos abertos e a algúns ata lles fixeron un carné VIP (con foto e todo!!). Nada máis chegar, a cada estudante asignáronlle un buddy, que será o seu guía na escola durante estas tres semanas. Aquí deixamos a única mostra da que dispomos do St. Gregory School, dun dos rapaces co seu buddy.
O alumnado que estaba no Cheney School tivo bastantes horas libres (cousa que cambiará a partir do luns, moi a pesar deles), mentres que a outra parte tivo clase de 8.30 a 15.10 (nosos coitadiños!). Iso si, fixeron un lunch break como Deus manda, a partir das 12.30 uns, e das 12.45 outros.
Unha vez rematada a xornada lectiva, reunímonos todos no Cheney School. Os que viñan do St Gregory School tiveron que subir a costa máis longa da súa vida… e logo falan de Vigo! Dende alí seguimos camiñando, xa todo o grupo, cara ao barrio de Headington, onde tiveron un pouquiño de tempo para explorar a zona.
Ás 17.00 voltamos ao punto de encontro, o Cheney School, onde algunhas familias esperaban polos rapaces. As monitoras dividímonos para acompañar a algúns á casa, en taxi ou en bus, xa que tivemos que reubicar a un dos estudantes. Todo sexa polo seu benestar! 🙂
Ata aquí o día de hoxe, con cada paxariño descansando xa no seu niño.
Esta fin de semana terán a oportunidade de coñecer máis ás súas familias, xa que tanto mañá como o domingo serán family days.
Manterémosvos informados!!
Boas noites, biquiños!! 🙂
