Boas!! Que tal estades, familias? Nós estupendamente, e ademais estamos desexando contarvos o que fixemos na excursión de hoxe.
Esta mañá erguémonos ben cedo e tomamos o bus de camiño ao noso primeiro destino, os Cliffs of Moher, uns cantís impresionantes que se elevan 120 m sobre o Atlántico e que se estenden ao longo de 8 quilómetros até alcanzar unha altura máxima de 214 m.
As vistas dende o alto son impresionantes polo escarpado das rochas. Non é de extrañar que sexa un dos lugares máis fotografados de toda Irlanda con máis dun millón de visitantes anuais. Por sorte tivemos un día solleiro e sen nubes, polo que tamén puidemos divisar ao lonxe as Illas Aran e a baía de Galway.
Alí tamén se atopa a O’Brien’s Tower, unha torre circular de pedra construída en 1835 por orde de Sir Cornellius O’Brien. Serve de miradoiro para as moreas de turistas que acoden diariamente ao lugar.
Despois de despedirnos destas paisaxes de postal, encamiñámonos ao Bunratty Castle, un castelo construído en 1425 e que se atopa en perfecto estado de conservación.
Forma parte dun parque turístico que recrea á perfección a arquitectura e o xeito de vidas tradicionais de Irlanda. Conta con granxas, tendas, muíños de auga e casas con cuberta de palla.
Xa dentro do castelo, a nosa guía explicounos que foi a principal fortaleza dos O’Brien durante os séculos XVI e XVII e que a meirande parte dos mobles e elementos de decoración son tamén desa época. Conta con tres andares e catro torres con ameas. Despois tivemos tempo para percorrer o castelo de arriba a abaixo e visitar cada cuarto, torre e salón que ten. Inspeccionamos mesmo os calabozos e aprendimos que neles guindaban os presos dende 5 metros de altura!
Por último fixemos unha fugaz parada na tenda de agasallos e puxemos rumbo de volta a casa. Xa cansos, pero moi contentos despois dun día tan completo.
Mañá poderemos descansar no noso día libre coas familias. Un saúdo e manterémosvos informados. Podéis ver todas las fotos en la galería de imágenes de Newlink.
Eva, Paloma e Antonio. 🙂