Good morning everyone!

Onte luns tocou volver á rutina da semana, polo que as nenas e nenos pasaron a mañá no colexio entre clase e clase.

A tarde si que foi distinta, xa que nos prepararon unha visita ao County Hall (casa do Concello) de Flintshire. Alí recibiunos a Chair Marion Bateman e levounos á unha sala para darnos a benvida e ofrecernos algo para beber e comer. Démoslle un regalo de parte do Concello de Vigo e as nenas e nenos presentáronse. Despois levounos á Cámara de Concello onde se adoita reunir co resto dos Councillors para tomar decisións importantes.

Iago presidiu a mesa coa “Mayor’s Chain” (collar) posta e puido usar o mazo para poñer orde na sala.

Candela fíxolle preguntas á Chair Marion sobre os sistemas que usan en Gales e tamén lle explicou (nun inglés perfecto) os diferentes aspectos sobre o sistema educativo e os colexios en Galicia. A Chair pediulle a Candela que firmase no libro de visitas. Despois fixéronnos un tour polo edificio para ver o resto das cámaras e xa nos despedimos.

Unha das coordinadoras de English Plus levounos no minibus a Mold para coller os distintos buses e poñer rumbo ás nosas casas, xa que coa que estaba caendo non podiamos facer moito máis.

See you!