Saúdos familias!
Esta tarde fomos de novo ao “Community Centre” e alí fixemos un xogo de animación grupal coñecido como a “Bomba”.
Os rapaces póñense en círculo e un queda no medio. Os do círculo pasan a pelota mentres o do medio vai contando… cando chega a 30 ergue un brazo, en 40 ergue o outro e ao chegar a 50 dá unha palmada e di “bomba”. Quen teña o balón nas mans senta no chan coas pernas estiradas e o xogador ao seu carón ten que saltar por riba del… así todos ata que só quede un.
Despois do xogo tamén tivemos tempo para dar unha volta por Ennistymon e facer algunhas compras. Ademais o tempo acompañounos e mesmo saiu unha raiola de sol!! Que máis podemos pedir??
Sempre que imos de paseo pola vila non podemos evitar chamar a atención alá onde imos. E non só porque sexamos 25 mozos e mozas sempre xuntos, senón porque vos somos moi falangueiros e estamos afeitos a parolar cun ton moito máis alto que o dos irlandeses.
Aínda así, non semella que isto sexa un problema para os locais. Sónchevos xente moi amable e non é raro que nos paren e se poñan a falar con nós.
Deica mañá e un saúdo de Eva, Paloma e Antonio! 🙂