Hi everyone!

Ao rematar a xornada estudantil tocou poñer rumba a Broughton, unha  localidade que pertence ao condado de Flintshire.

Que mellor remedio para quitar o estrés do estudo que…unha tarde de compras.

Good afternoon everyone!

O noso cuarto día en Wales! O tempo empeza a poñerse un pouco feo. As temperaturas baixaron e chegou a chuvia, pero iso non vai facer que se nos pasen as ganas de pasalo ben.

Toca pasar a mañá no High School de clase en clase, pero chega a tarde e é hora de facer algo diferente. Onte de actividade tivemos Ice Skating, así que a poñer os guantes e a preparar o corpo para unhas cantas caídas.

Hai que dicir que todas e todos saíron ilesos, igual con algunha mazadura que outra pero pasárono moi ben, que é o importante.

Toca sesión de fotos para que vexades que patinadores tan talentosos temos neste grupo:

Segundo día de High School!

Pola mañá tiveron un intenso día de clases e ao rematar reunímonos no Café Isa para descansar de tanto estudo e comentar como foi o día.

Pouco despois Marta, Candela, Mencía e Isabel volveron ao cole para rematar de facer un precioso mural que quedou exposto nun dos corredores do instituto. Trataba sobre Galicia e, como non, Vigo. Hai que dicir que lles quedou moi bonito, como se nota o que lles gusta a súa terriña!

O resto quedamos un ratiño máis na cafetería tomando uns granizados e botándonos unhas risas.

Despois volvemos para o colexio para que algúns os viñesen a recoller as súas host families e outros quedaron ata máis tarde no colexio, xa que era a Open Evening (o día de portas abertas) e as familias podían visitar o colexio e ver as clases. Había aulas ambientadas en libros e películas, por exemplo, a  librería converteuse en no mundo de “Alice in Wonderland” e na aula de Ciencias estaba o Professor Snape facendo unha das súas pocións.

Déixovos algunhas fotos do día. Xa me diredes se o mural non quedou chulo. Estas rapazas e rapaces son todos uns artistas!

Good evening everybody!

Onte as nenas e nenos tiveron o primeiro contacto co colexio e cos que serán os seus compañeiros estas 3 semanas. Fixéronlles un tour polo colexio e  tiveron as primerias clases  como Historia, Deseño e Tecnoloxía, Drama… Despois das clases tamén tiveron tempo para xogar ao balón prisioneiro.

Todas e todos se están acostumbrando á comida, os buses, as clases… Nun par de días xa o terán todo controlado e pasarán por nativos perfectamente.

A immersión lingüística están sendo bastante profunda, xa combinan á perfección o galego, o castelán, o inglés e algúns ata se atreven co francés tamén.

Déixovos por aquí algunhas fotos do día de chegada camiño no bus e outras feitas no colexio para que vexades que guapos están cos uniformes.

Good night!

Bos dias desde Wales!

Despois dun bo madrugón e un intenso día entre aeroportos, todas e todos chegamos a Mánchester, cunhas poucas olleiras pero chegamos.

No bus camiño a Flintshire aínda nos quedaban forzas para cantar unha que outra canción (Mamma Mía de Abba Gold, reggaetón, un pouco de todo, vamos…). Fixemos unha breve parada para comer algo e logo nos puxemos en marcha para chegar ao noso destino.

Por último, tocaba coñecer ás nosas familias e descansar para estar preparados para o primeiro día de cole.

Mañá máis e mellor. See you!

Ola a todas e a todos!

Xa tendes todo preparado para aterrar en Wales?! Maleta, adaptador de enchufe, DNI, permiso paterno… e, por suposto, moitas ganas!

Antes de nada, por aquí me presento como a vosa monitora durante estas 3 semanas. Chámome Belén, son de Meis,  teño 30 anos e estudei Tradución e Interpretación na Universidade de Vigo.

Con 16 e 17 anos estiven estudando Inglés en Irlanda e Malta, e durante a carreira realicei o meu Erasmus en Frankfurt am Main, polo que podedes ver que me encantan os idiomas, viaxar e coñecer novas culturas.

Estou desexando comezar esta experiencia con todas e todos vós e asegúrovos que a imos aproveitar ao máximo. Irei publicando neste blog todo o que fagamos estas semanas para que todos poidan ver o ben que o pasamos!

Non esquezades traer con vós o DNI e o permiso paterno para poder viaxar, seguro que xa volo dixeron mil veces, pero nunca está de máis un recordatorio de última hora.

Vémonos entón o luns no aeroporto, fannos madrugar un pouquiño pero valerá a pena o esforzo.

Un saúdo e aquí me tendes para o que necesitedes.