6 de outubro. E veña deportes!

Xa estamos a martes, é incrible como pasa o tempo!!

E como xa é rutina para nós, os martes toca mover esqueleto, articulacións e músculos cos fantásticos Circuit Trainings! A novidade do día de onte foi que nos acompañaron un montón de rapaces e rapazas do instituto, para que vexades que por fin, despois de dúas semanas e media, xa nos mezclamos ben!

Equilibristas

Series de exercicios de 30 segundos cada un, e dúas series da volta completa! Non sabemos se é porque o circuit training da semana pasada nos deixou xa coas peores maniotas ou se este era máis ameno, pero pasámolo moito mellor!

Circuit training Sentadillas, todas a sufrir!

Ademais, contamos coa magnífica actuación de dúas picadiscos profesionais, Tania e Clarisa, que nos puxeron temazo tras temazo e nos amenizaron a sesión!

Esta semana estará chea de sorpresas e actividades, non nos perdades a pista!

Deica loguiño!! =)

5 de outubro. Embaixadores/as de Vigo por un día!

Hola de novo a todos e a todas!

Pensabades que as súper sudadeiras de Vigo en Inglés eran bastante representación? Que aínda non se enteraran do bonitas que son as Cíes ou do exercicio que facemos subindo as costas de Vigo? Pois por se acaso os irlandeses aínda non se enteraran de onde vimos (que non a onde imos)… o luns fomos de visita oficial ao Cork County Council, algo así coma a deputación provincial!

IMG-20151006-WA0004 diputados Grupo

Xunto cos nosos compis de Malow, era o segundo día que iamos a Cork, pero desta vez tivemos unha acollida por todo o alto: dous homes que tiñan de simpáticos e amigables o mesmo que de elegantes e protocolarios. Tiña pinta de que ía se moi formal, pero axiña perdemos a vergoña!

Tivemos o privilexio de contar con dous grandes portavoces dos estudantes: Ana do grupo de Kanturk e Martín do gupo de Malow, e unha vez dentro da sala de plenos puidéronlles explicar aos nosos anfitrións (un concelleiro e o alcalde) un pouco máis sobre a nosa cidade.

Vigo en Inglés

Entregámoslle un libro bilingüe con imaxes e a historia da cidade olívica e tiramos centos de fotos en grupo e selfies (si, tamén, xa vos dixen que eran uns pándigos!). Cando rematamos despedímonos deles e como fomos tan eficientes, aínda nos quedou un ratiño de tempo libre para pasear por Cork antes de volver para casiña!

E os días pasan…!

4 de outubro. Segundo (e último) domingo en familia!

Boas días familia!!

Estes días estivemos taaaaan ocupad@s que o noso cerebro non dá xestionado tanta información e tanta foto! =D

Despois da excursión de día completo a Killarney o sábado, este domingo erguémonos cun ceo un pouco nubrado que nos tentou a quedar de remolóns na cama… pero nada diso! Día de relax para o corpo, pero non para o cerebro, que aquí aprendemos e descubrimos cousas novas 24h ao día!

Primeiro paso… o almorzo! Para que vexades que os irlandeses tamén son xente normal que toma cereais pola mañá (esquerda), aínda que ás veces a primeira comida do día se lles vaia un pouco das mans (dereita)!!

Desayuno con vistas! Desayuno irlandés

Como sabedes, os domingos son os días dedicados ás host families: tempo para ir de paseo, de compras ou simplemente ver unha peli típica dos domingos (aínda que aquí sen Antena 3 e sen pipas). Os nosos rapaces fixeron un pouco de todo, e houbo plans para todos os gustos: dende comida familiar nun restaurante ata un tea time, pasando por unha carreira benéfica e unha partida ao monopoly!

Carrera benéfica Monopoly!

Aquí só vos amosamos un pouquichiño, pero sabede que se queredes ver todas as fotos desta experiencia, só tedes que entrar na Galería de imaxes de Newlink!

Saudiños!

2 e 3 de “outubrrroo”… chega o frío, pero nós non paramos!

Boas de novo family!

Foi chegar o mes de outubro e con el a néboa e a humidade… pero nós seguimos aquí ao pé do canón dispost@s a aproveitar ao máximo as horas kanturkianas! Os luns sempre son difíciles, así que esperamos que coa lectura desta entrada se vos alegre un pouco o día vendo (ou máis ben, lendo, o ben que o pasan os vosos rapaces e rapazas). Comezamos! =D

O venres día 2 tivemos tarde de bádminton na escola. Para comezar tivemos unha pequena presentación sobre as regras e as técnicas deste xogo que naceu nada máis e nada menos que na India!

Atentos a las explicaciones del profe

En varios grupos e por turnos practicamos diferentes exercicios de saque e de pase da pluma para despois rematar a tarde cuns partidos.

Bádminton

O sábado… a estas alturas xa saberedes o que pasa os sábados, esperamos…!

Pois claro, o sábado tivemos excursión, desta vez á vila de Killarney e arredores! O autobús, que xa recollera aos nosos compis de Mallow, recolleunos en Kanturk ás 09:30.

Despois dunha hora de viaxe chegamos á Muckross House, una casa de estilo victoriano do século XIX e rodeada duns xardíns e uns lagos impresionantes! De feito, este terreo foi o primeiro parque natural da República de Irlanda! Puidemos dar un paseo ao noso aire e o primeiro que fixeron algúns dos rapaces foi ir directos ás carruaxes de cabalos para que lles deran unha volta… Saíronnos vagos! O resto fomos descubrir o bosque e a beira dos lagos para respirar aire fresco e como non, tirar unha morea de fotos!

Muckross House Panorámica simétrica

 

DSCF4326

Cando volviamos para o bus, que nos levaría ata a Torc Waterfall (unha catarata preciosa), enterámosnos de que a algún grupo dos máis deportistas xa se lle ocorrera ir ata alí modo sprint! Chegamos alí, un sitio moi turístico, e resulta que se estaba celebrando un duatlón: bicicletas por todos os lados e corredores e corredoras para arriba e abaixo… e a nós que xa nos custaba subir despaciño!

Grupo en la Torc waterfall

Como terceira parada do día tivemos á vila de Killarney, un lugar cheo de colores e encanto! Non tiñamos nin idea, pero ademais de nós, alí había moitos outros turistas e visitantes que gozaban dos cafés, dos bares con música en directo ou das tendas de recordos cheas de postais e bonecos de leprechauns (os trasgos irlandeses). Porén, o que máis lles interesaba aos nosos mozos e mozas non eran os rincóns misteriosos e orixinais de Killarney, senón as tendas para ir de shopping! Déronnos varias horas libres, polo que tivemos tempo máis que de sobra para facer de todo un pouco!

Cara ás 6 da tarde e coas mans cheas de bolsas voltamos para o noso querido Kanturk, algúns xa con plans familiares, e outros coa intención de ir para á casa e facer un “sofá, manta e peli”!

Próxima parada: concello de Cork. Toca presumir de Vigo!!

1 de outubro. Cambiamos de mes á irlandesa!

Pois xa estamos aquí de novo! Esperamos que todos e todas empezarades o novo mes coas mesmas ganas coa que o fixemos nós aquí en Kanturk! =)

Sabedes iso de que en Irlanda podes ter todas as estacións do ano nun só día? Pois aquí debéuselles escacharrar a máquina e quedaron bloqueados no verán, así dá gusto! E é que a calquera que se lle conte… esta mañá volvemos amencer cun precioso e brillante Lourenzo no ceo que durou toooodo o día!

tmb-tees-seasons1

Onte foi un día tranquilo, tivemos clase coma todos os días (ides queda coa boca aberta: non só son uns máquinas co francés aquí no instituto… tamén están aprendendo gaélico!) e despois de comer e de traballar un pouco na preparación do “espectáculo sorpresa” deixáronnos saír un pouco antes para poder dar unha volta e relaxarse.

Esta tarde volvía tocar poñerse en forma cun pouco de Volleyball, pero adiviñade o que… algúns e algunhas aínda tiñamos tantas maniotas do súper circuíto do outro día que houbo quen quedou no banquillo!

10l, 7l, 3l... El banquillo estrujándose el cerebro

E diredes: “Pois vaia morro, quedan sentados e non sudan a gota gorda coma o resto?” Non, non… aquí a unhas servidoras non se nos escapa nin unha rata e nun momento propuxémoslle un challenge mental. Poñémosvolo aquí abaixo por se vos atrevedes e lle queredes botar un ollo, pero contade cun bo rato para sacalo!

Despois de darlle mil voltas e coa aportación de todos lográmolo xusto a tempo para a segunda parte da actividade: un pouco de fútbol ao aire libre!

Jugando a volleySoccer

Aquí en Irlanda o deporte máis coñecido é o fútbol gaélico, polo que ao “noso” fútbol coñéceno máis como soccer. Como facía tan bo tempo pasámolo xenial. Isto máis que o final parece o comezo do verán!

Remataremos esta entrada dándovos un pouquichiño de envexa. A comida galega é de campionato, pero mirade como o montan os irlandeses para almorzar pola mañá! Aquí vos deixamos co típico Irish breakfast.

Irish breakfast

Ovo, salchichas, bacon e black pudding (morcilla). Boísimo!

Bo proveito e deica mañá! 😉

Para alimentar o cerebro!

Para alimentar o cerebro!

Podéis ver todas nuestras fotos aquí

29 de setembro. We’re sexy and we know it!

Vaia martes máis movidiño que tivemos hoxe, así dá gusto empezar a semana! Hoxe non foi un día coma outro calquera, queridos pais, nais e demais público!

Pola mañá tivemos na Scoil Mhuire (o noso insti) un show no que os alumnos e alumnas de primeiro e segundo grao se disfrazaron e participaron nun concurso. Non temos fotos, pero damos fé de que dúas das nosas rapazas, Laura e Sabela, recibiron un premio polo seu disfraz de panteiras/leopardas/leonas… chamémoslle X.

Despois de comer e como cada día, tiñamos unha actividade preparada e hoxe tocaba suar! Eles chamáronlle Circuit training, pero para nós foi máis ben un “1000 Maneras de morir”. Para que vos fagades unha idea, os profes xunto con algúns estudantes da escola, organizaron un percorrido dunhas 12 actividades para traballar diferentes partes do corpo. Tiñamos que facer cada unha delas durante 30 segundos e despois ir rotando no sentido das agullas do reloxo.

Esos glúteos! Legs up!

Parece moi aburrido e duro, non si? Pois mirade se os nosos vigueses e viguesas teñen moral, que ao final pasámolo en grande! Tivemos un pouco de todo: abdominais, sentadillas, pesas…


Cómo pesaba la bolita! De risas en educación física

… traballamos bíceps, tríceps, glúteos…

Los chicos haciendo sit-ups

… pero sobre todo puxémonos en forma, rimos, liberamos un pouco de estrés… e pasou a tarde voando! Xa sabedes, circuit training 100% recomendado!

Deica mañá lectores!

Salta, salta, pequeña langosta!

28 de setembro. Relax coas host families!

E xa estamos de volta!

Despois da viaxe intensa e tantas voltas que demos o sábado en Cobh e Cork… este domingo tocaba durmir ata tarde e pasar os días coas host families!

De paseo con la host family... y con buen tiempo!Domingo en CorkFamily time

Algúns dos nosos vigueses e viguesas xa tiñan dende hai uns días un plan moi especial… nada máis e nada menos que ir ata a capital, Dublín, para ver a final do campionato femenino de fútbol gaélico entre Cork e Dublín. Foi un partido moi emocionante, segundo nos contan fontes de primeira man, pero pese a xogar na casa, a que non sabedes quen gañou? Pois claro, CORK! Debe ser que lle trouxemos boa sorte dende Galicia…

Andrea con su prima en el partido Fútbol gaélico GAA

Os afortunados que viaxaron a Dublín foron só uns poucos, pero iso non significa que o resto non aproveitaran o día ao máximo. Tivemos un pouco de todo: algúns foron de paseo polo campo, outros pasaron a tarde no centro comercial de Cork (non, aquí en Kanturk non temos diso, todo é máis old school!). Tamén houbo que tivo plan de palomitas, peli e manta coa familia, quen tivo unha masterclass en cociña tradicional…

Porén, se algo abunda en Irlanda, especialmente nesta rexión na que nós nos atopamos son… OS ANIMAIS! Ovellas, vacas, cabalos, burros e moitos outros forman parte da vida cotiá aquí. Tanto, que xa temos unha certa confianza… se non me credes, mirade a manchea de fotos que temos xa!

Amigos irlandeses fuera de lo común IMG-20150928-WA001328

Esta mañá tocou volver a comezar unha nova semana de clase e fixémolo cheos de enerxía. Xa coñecemos máis ás familias, a lingua xa deixa de ser unha traba e pouquiño a pouco ímonos integrando na máis pura vida irlandesa. Aínda queda moito por disfrutarmos aquí, que isto non fixo máis que comezar. Aló imos!

25 de setembro. HOXE QUEIMAMOS IRELAND! =)

HOXE QUEIMAMOS IRELAND! =)

Ladies and gentlemen, come on and enjoy the show! Hoxe tivemos un día de película cos nosos rapaces e rapazas!

Coma sempre, as host families trouxeron aos estudantes ao punto de encontro co autobús ás 9 da mañá. Un pouco cedo para un sábado, certo, pero merecía a pena porque iamos visitar a “verdadeira capital de Irlanda” como lle encanta dicir a Goretti, a nosa organizadora local (non hai dúbida da cidade na que naceu! ;D).

Todos e todas foron puntuais e non o creredes, pero non houbo ningún que esquecera a famosa e chachiguai sudadeira vermella de VIGO EN INGLÉS (yihaaaaaa!!).

Foto de grupo freestyle! Con las monitoras en Cobh!

A primeira sorpresa chegou xusto antes de montar no bus, cando Goretti nos dixo que só unha das monitoras podería ir no autobús cos rapaces e que Alba tería que levar o coche ata unha localidade próxima, Mallow. Como o oídes, temos entre nós a unha experta ao volante! Non hai curva, condución pola esquerda ou volante á dereita que se lle resista!

Unha vez en Mallow tivemos o gran reencontro co noso grupo de compis que chegou o xoves pola noite. A duración total da viaxe foi dunha hora e media, pero con tantas anécdotas e experiencias que contar, a verdade é que pasou voando e foi moi agradable para todos nós (monitores incluídos!).

A primeira parada do día foi Cobh (pronunciado /kov/), unha vila a uns 20 minutos ao leste de Cork. E por que fomos aquí, estarédesvos a preguntar? Pois porque ademais de ter unha arquitectura e unhas vistas moi bonitas, foi a última parada do famoso Titanic antes de que se afundira, e iso, queirades que non, atrae turistas! Alí tiramos fotos, fixemos un pouco o parvo, visitamos a catedral e ata falamos con xente que coñecía Vigo! Se é que somos internacionais!

Sí, sí, el Titanic Éxito total!! Chicos formales_ Alba y las chicas_

Cara ás 10:45 saímos para o Fota Wildlife Park, un magnífico zoo natural onde non existen as gaiolas e non saben o que significa a palabra catividade. Alí tivemos tempo libre, polo que cada un puido comer, visitar o parque ou simplemente deitarse ao sol como lle praceu. O parque en si era incrible, xa que puidemos ver máis de 100 especies animais, tales coma xirafas, macacos, tigres, avestruces…

Por se ata aquí non vos parecía un bo plan, dirémosvos que tivemos un tempo de tolos! Sabedes iso que din de que en Irlanda chove todo o tempo? Que non se pode saír sen paraugas…? POIS TODO MENTIRA! Máis ca en Irlanda, parecía que estiveramos nas Canarias. De tanto sol e calor que tivemos ata algún nos atrevemos a quedar en camiseta de manga curta, todo un atrevemento!

Ás 14:30 volvémonos xuntar todos, fixemos máis fotos (e un pouco máis o parvo tamén) e voltamos ao bus para irmos a ese lugar tan esperado…CORK NOOOOOON, PENNIES!!! E é que todos tiñamos unhas ganas inmensas dun pouco de shopping, polo que tivemos un pouco máis de dúas horas para probar modeliños, tomar un frappuccino do Starbucks e pasear pola cidade. Foi unha marabilla, e todos subimos ao bus cun gran sorriso, aínda que un pouco cansos despois dunha xornada tan intensa.

Chegamos de volta a Kanturk ás 18:30, desexámonos un bo domingo (que plan lle terán reservado as familias aos rapaces? Que emoción!) e cada un marchou para a casiña a cear e a pasar o resto da tarde coas familias.

Non está nada mal para un só día, verdade que non? Esperamos que vos gustase lernos e  coma sempre, voltaremos moi pronto con frescas e interesantes historias que contarvos!

Saudiños!

 

Alba e Olalla

23 de setembro – Primeiros contactos coa Irlanda profunda!

Boas de novo a todas e todos!

Onte, mércores, levantámonos cun bonito e soleado día, que para estar en Irlanda, non é pedir pouco. Parece que estamos a ter sorte co tempo!

Despois dunha intensa mañá de clase cos seus novos compañeiros irlandeses, o noso grupo de estudantes xuntáronse para organizar unha sorpresa da que, de momento, non podemos dar moitos detalles. CHÁN CHÁN! Ao rematar esta actividade e como cada día, as súas host families foron recollelos para pasar unha entretida tarde en familia.

Todos os rapaces e rapazas están moi contentos coas familias. Polo que sabemos, están a aprender moito da cultura irlandesa, sobre todo a nivel gastronómico.

Hoxe pola mañá volveron a ter clase: irlandés, matemáticas, historia, francés… Un pouco de todo. Aínda que solamente estamos no terceiro día, os nosos estudantes xa empezan a soltarse e a participar nas clases.

Esta tarde tivemos a oportunidade de coñecer de primeira man os deportes por excelencia de Irlanda: o hurling, e o fútbol gaélico.

O hurling é un deporte de orixe celta, de máis de tres mil anos de antigüidade. Existe unha versión feminina do xogo máis coñecida como camogie. Xógase cuns paus de madeira, chamados hurleis cos que se golpea unha pelota (sliotar). O obxectivo do xogo é que os xogadores fagan pasar o sliotar entre os postes do opoñente, xa sexa por riba do traveseiro para gañar 1 punto, ou por debaixo do traveseiro nunha rede defendida por un porteiro para conseguir 3 puntos.

Chicas y hurling Probando el hurling

Mentres que o fútbol gaélico, chamado en irlandés Peil ou Caid, é unha variante do fútbol que se xoga en equipos de 15 xogadores sobre céspede con porterías en forma de H a ambos lados. O obxectivo principal é anotar puntos pateando ou golpeando o balón coas mans e introducilo na portería rival. Os xogadores avanzan polo campo levando o balón nas súas mans, pateándoo e pasándoo entre compañeiros de equipo.

Entrenamiento de fútbol gaélico El equipo de las chicas con el profe

A pesar das explicacións do profe, descubrimos que xogar a estes deportes non é tan fácil como parece, pero que poñéndolle ganas e paixón podémolo pasar moi ben.

Está sendo una moi boa semana de adaptación, e mañá comeza un gran fin de semana coa busca do tesouro na escola, e o sábado unha excursión todo o día a Cork e a Cobh. Saberiades dicir por que é coñecido este lugar? Se queredes saber a resposta, seguídenos lendo!

Un saúdo,

As monitoras: Olalla e Alba

Día 21 e 22 de setembro – Saída de Vigo e chegada a Kanturk

Hello everyone! Somos Alba e Olalla, as monitoras do grupo en Kanturk, unha vila do idílico rural irlandés. Durante as próximas semanas contarémosvos todas as aventuras e novas experiencias que vaiamos vivindo, para que esteades ao día, e de paso darvos un pouco de envidia! 😉

A viaxe comezou onte pola mañá, cando estudantes e monitoras nos xuntamos en Peinador para darlle comezo a estas tres semanas. Voamos ata Madrid, onde cambiamos de avión para despois chegar á capital irlandesa: Dublín.

Alí esperábanos Goretti, a responsable local, unha muller moi simpática que nos recargou as baterías coa súa alegría e enerxía. Tiñamos por diante unha viaxe un pouco longa ata Kanturk, dunhas tres horas. Non obstante, debido á trementa tormenta que pillamos polo camiño (con lóstregos incluídos!) e ao denso tráfico, tivemos un retraso de nada… dúas horas!! Por sorte, e a pesar da longa viaxe, os rapaces e rapaces non desesperaron, e ao final foi máis ameno do que esperabamos.

Cando chegamos a Kantuk as familias xa estaban esperando por nós. Algunhas nais ata daban saltiños de alegría ao ver aos seus vigueses e viguesas! Entre risiñas nerviosas, caras de resignación e constantes “a min vaime dar algo”, cada estudante marchou coa súa host family para descansar como se merecían.

Esta mañá era O GRAN DÍA!

Á primeira hora chegaron á escola, no centro de Kanturk, onde coñeceron aos seus buddies irlandeses. Máis tarde tivemos unha reunión informativa, onde lles contamos as regras básicas de convivencia coas familias e no instituto, ademais dalgunhas tips para gozar e aproveitar ao máximo esta experiencia.

Grupo na reunión

O resto do día consistiu en clases cos seus compañeiros “kenturkianos”. Porén, despois de tanto esforzo en tan pouco tempo, todos puideron saír un pouco antes para desfacer as maletas, pasar tempo coa súa host family e sobre todo, descansar!

Polo de agora iso é todo, pero mañá máis e mellor!