Bos días!

Que tal se presenta a vosa fin de semana? A nosa bastante ocupada! Por ese motivo, a tarde de onte foi finalmente dedicada a ter tempo libre, demandado polos propios estudiantes. Tratouse da última entre semana que tiñan en Prestatyn, e pediron poder empregala para pasear pola vila e tomar algo todos xuntos.

Pola mañá, sen embargo, tiveron que mostrarnos o resultado do seu traballo durante estas tres semanas nunha presentación sobre as diferencias que existen entre Galicia e Gales en relación a diferentes temas: as linguas, os deportes, as casas, a comida, a escola e as tradicións. As presentacións foron en inglés e, a pesar dos nervios normais por ter que falar en público, todo saiu estupendamente! Os alumnos demostraron ter preparado ben o traballo.

Ademais, a modo de despedida, o colexio invitou tanto aos alumnos españois como aos galeses a unha “lunch” típica galesa preparada polos propios estudantes de cociña do centro. Todo un detalle que permitiu aos rapaces e rapazas probar pratos novos. Hai que dicir que os houbo con máis e menos éxito, o que non deixa de ser normal ao tratarse de comidas tan distintas ás que están afeitos!

Foi, en definitiva, un día relaxado para todos, como corresponde aos días finais logo de tres semanas sen parar quietos e previos a unha fin de semana de despedidas!

Bo día de novo!

Como foi o voso mércores? O noso pasado por auga en moitos sentidos! Tocounos sufrir o típico día galés de chuvia e humidade e, por se fora pouco, a actividade da tarde levounos a unha piscina cuberta na que os rapaces e rapazas puideron pasar unha tarde a remollo.

A pesar das condicións climatolóxicas no exterior, a piscina estaba perfectamente acondicionada e os rapaces desfrutaron dela ata que non quedou máis remedio que pensar en voltar.

Quen ía pensar que, cun tempo coma o de onte, se podia ir á piscina e non querer saír dela! A temperatura tanto do local como da auga axudaron a que os rapaces aproveitaran ata o ultimo minuto da actividade.

Unha vez finalizada, tocou que cada un volvera á súa casa e, a pesar do arriscado que é coller un bus en Prestatyn, finalmente acabamos por chegar todos ao noso destino. O intercambio está a chegar ao final e os alumnos nótano e parece que non lles gusta. Hai que aproveitar estes últimos días que, ademais, coinciden coa fin de semana, para volver a casa sabendo que se aprendeu e desfrutou todo o que se puido!

Bo día! Que tal?

Por aquí, a mércores, xa imos vendo o final cada vez máis cerca e toca aproveitar estes últimos días en Prestatyn e Rhyl ao máximo! A actividade de onte foi especialmente “peculiar” e hai que dicir que, se ben houbo estudiantes que a desfrutaron, outros non o fixeron tanto! Agora vos explicamos:

Logo dunha mañá de clases, dirixímonos aos Botanical Gardens de Rhyl onde nos esperaba Sue, unha muller que traballou no zoo durante moitos anos e tiña moito que nos contar sobre animais. Comezou a actividade preguntando aos rapaces e rapazas sobre as súas mascotas para, seguidamente, falar ela das súas. Se os estudantes galegos tiñan cans, gatos, tartarugas ou peixes, Sue esta acompañada por criaturas ben distintas, e puidemos coñecer algunhas delas! Iso si, antes de ensinar nada, preguntou que animais nos daban medo porque a actividade quería sorprender aos rapaces pero nunca facerlles pasar medo.

En primeiro lugar, vimos un dos bichos pau que coida. Tamén nos ensinou un caracol ben grande, así como un par de cucarachas. Podemos dividir as reaccións dos alumnos en dous grupos: os que non dubidaban en coller os bichos, tocalos e sacarlles fotos e os que non querían saber nada deles. Como pode alguén ter unha cucaracha na casa!, debían de pensar. Sen embargo, o peor para eles aínda estaba por chegar: o animal estrela que Sue trouxo para nos ensinar era nen máis nen menos que unha tarántula! Neste punto, algúns dos rapaces preferiron non  ver o que viña a continuación, e mellor! Menuda araña garda Sue na súa casa! Incrible!

Logo do que podemos chamar unha “minivisita” ao zoo, Sue e os rapaces conversaron sobre o importante que é tratar ben aos animais e ás mascotas, e puidemos escoitar varias anécdotas divertidas que lle pasaron ao longo de tantos anos de coidar animais “estraños” na casa. Aínda que esta non era unha actividade para todo o mundo, non se pode dicir que sexa algo que se faga todos os días!

Bo día, familia e amigos!

Que tal foi o voso luns? O noso bo, a pesar do vento que se levantou en Prestatyn, e moi aproveitado xa que foi o ultimo que pasamos na vila antes de regresar! A mañá, coma sempre, cubriuse coas clases do instituto e rematou, coma todos os luns, con dúas alumnas prestándose voluntarias para participar no Spanish Group, na clase extraescolar de castelán que ten lugar os luns e xoves. Nela, conversan cos alumnos galeses que están aprendendo o idioma e axudan a que perdan a vergonza inicial lóxica de falar un idioma que non é o propio.

Sen embargo, as voluntarias tiveron desta vez que marchar un pouco antes da clase rematar, xa que debían estar na estación de buses de Prestatyn en hora para chegar á actividade da tarde! Hoxe tocaba unha clse de danza tradicional con Rob e Julie, aos que xa coñecimos a semana pasada. Canta enerxía se gastou! Primeiro, os alumnos aprenderon pasos básicos do baile tradicional galés.

Se pensaban que este baile era todo, a continuación aprenderon in baile típico da zona limítrofe entre Inglaterra e Gales: a danza Morris. A particularidade deste baile é que se precisan paus para completer a coreografía. Os estudiantes demostraron ter moi bo ritmo e moi boa psicomotricidade, porque, a medida que avanzaba a actividade, tamén avanzaba a dificultade!

Ao rematar os estudiantes quedaron con algo de tempo libre antes de ir cear, pero non sei se logo de tanto movemento e exercicio terían ganas de outra cousa que non fora descansar para aproveitar ben esta última semana que nos queda!

Bo día!

Que tal o voso sábado? O noso completo, visitamos Chester e xa podemos dicir que coñecemos a cidade a fondo! Quedamos ás nove na estación de tren para procurar coller o tren das 9 e así chegar sobre as 9.30 e, dado que os alumnos foron todo o puntuais que se pode ser, conseguímolo. Unha vez chegamos, dividimos o día en dúas partes: unha visita cultural seguida de tempo libre para que os alumnos puideran desfrutar dun paseo relaxado polo centro da cidade.

En primeiro lugar, dirixímonos á catedral de Chester, edificio impoñente onde os haxa! Os alumnos pasearon polo seu interior, que ademais estaba adornado cunha exposición temporal que a dotaba dun aspecto, canto menos, curioso para una catedral.

Logo dun paseo á beira do río, chegamos ao centro da cidade. Alí, Karen, a monitora, levounos ao anfiteatro e deunos unha pequena charla sobre a cidade. Que interesante é sempre aprender cousas sobre os sitios que se visitan! Unha vez visitamos os puntos importantes da cidade e comimos nun dos seus parques, os alumnos tiveron tempo libre para ver as numerosas tendas do centro, e cruzarse con xente realmente “dressed up”, vestida de etiqueta para desfrutar da última carreira de cabalos do ano. Que sorte ter ido a Chester nunha data tan sinalada!

O día tivo varios momentos pasados por auga, o cal non nos impediu desfrutar do seu casco antiguo tan ben coidado, das shops, do Starbucks e, para algúns alumnos, tamén da súa primeira experiencia no Subway! Foi unha excursión de sábado moi ben aproveitada, é desde logo unha sorte ter un sitio como Chester tan cerca de Prestatyn!

Bo día a todos e todas!

Venres xa! A mañá que rematou cos alumnos axudaron aos estudantes de español galeses cos seus deberes, tocaba dirixirnos á actividade da tarde. Non podía ser máis propia dunha fin de semana: pizza e película. Logo dunha semana de visitas e movemento, un plan relaxado vén realmente ben! Cales foron as novidades desta actividade? Que a pizza foi feita polos propios alumnos e que puideron invitar a alumnos galeses a participar nela! Algunhas das buddies das rapazas aceptaron encantadas e así a velada fíxose un pouco máis “internacional”.

Chegamos ao lugar onde nos citaran para levar a cabo a elaboración da pizza e o visionado da película e fixádevos que maravilla! Coincidiu, ademais, que o venres foi un día no que evitamos a chuvia e os rapaces puideron aproveitar as instalacións.

Logo dun rato de xogo, puxéronse, nunca mellor dito, “manos a la masa”: tocaba elaborar a pizza que cada un quería! Cos ingredientes que tiñan á súa disposición, crearon a súa pizza personalizada, que foi directa ao forno para que os estudiantes puideran degustala o antes posible!

Logo dun chisco, as pizzas estaban feitas e os alumnos comprobaron quen foi o estudiante que máis acertou na elaboración! O certo é que é difícil saber quen desfrutou máis dela se temos en conta o pouco que sobrou. Era hora da película! A escollida (logo dunha ardua negociación) foi a xa clásica “Clueless”. Aínda que houbo quen se enfrascou na historia que conta, moitos dos alumnos preferiron continuar a velada ao aire libre e seguir interaccionando cos alumnos galeses. Unha vez rematou a actividade, algo máis tarde do usual, os alumnos despedíronse e marcharon á súa casa descansar para a excursión do día seguinte.

Ola de novo!

Xa é venres, o que quere dicir que a fin de semana está aí para descansar dos días de instituto. Que rápido pasou esta semana, como se nota que xa estamos adaptados ao ritmo de aquí! En calquera caso, estivo chea de actividades e os estudiantes non pararon un segundo quietos, así que se agradecen un par de días de relax.

O día de onte, xoves, dúas alumnas dedicaron a última hora de escola (de 15 a 16h) a colaborar no Spanish Club, unha clase na que os estudantes de castelán poden desfrutar de horas extra para avanzar nos seus coñecementos sobre o idioma. O Spanish Club ten lugar os luns e os xoves, co cal os xa levan aproveitando a presenza de falantes nativos durante catro clases. Nelas, manteñen pequenas conversas cos alumnos de España e van perdendo a vergonza inicial a empregar unha lingua que non é a súa.

Logo dunha longa xornada lectiva, dirixímonos ao concello para coñecer ao alcalde, councillor Gerry Frobisher, que nos deu unha pequena charla sobre Prestatyn, a maneira de funcionar dos plenos municipais, o seu escudo e ofreceuse a resolver todas as dúbidas que tiveramos sobre a vila. Puidemos darlle finalmente o regalo de parte do seu homólogo vigués, consistente nun libro de fotos das Illas Cíes e a bandeira do Concello de Vigo e, por se fora pouco, os alumnos puideron firmar no libro de visitas do concello onde deixou a súa rúbrica en 1969, cando foi coroado Príncipe de Gales, o mesmísimo Carlos de Inglaterra! Para rematar, Mr Frobisher deixou que probaran e se fixeran fotos coa cadea do alcalde e levar in bonito recordo desta visita!

Bo día a todos e todas!

Onte tivemos unha xornada pasada por auga. Parece que Gales quere lembrarnos que estamos tendo moi boa sorte co tempo e facernos ver que o clima real do país non é soleado e de temperaturas agradables! En calquera caso, o plan de onte foi interior, así que pasamos unha tarde a resguardo sen mollarnos demasiado. Que cal foi a actividade? Pois un Biritsh Quiz, un xogo que consistía en determiner cal dos tres equipos nos que se dividiron o grupo de estudiantes galegos sabía máis sobre Reino Unido!

Por suposto, os equipos tiñan que pensar nun nome en inglés que os diferenciara e pronto chegaron a eles: o equipo Chocolate, o Umbrellas e o The Five. Agora que estaban identificados, podia dar comezo a competición!

As probas que tiveron que levar a cabo foron moitas e variadas. Por exemplo, aquí temos unha prioba gráfica da primeira: un debuxo de memoria do mapa de Reino Unido. Que vos parece? Se forades xurado, a que equipo lle dariades a puntuación?

Pero non só tiveron que debuxar os equipos, tamén houbo probas nas que tiveron que cantar, outras nas que tiveron que comprobar canto sabían sobre gastronomía británica e moitas preguntas sobre Reino Unido. Mesmo tiveron que pronunciar unha frase en gales logo de escoitala unha soa vez. Non foi un concurso fácil!

Logo dunha ardua batalla (memorística, non hai que se alarmar por nada), o equipo gañador foi o de Umbrellas, pero as puntuacións non puideron ser máis axustadas! Noraboa a todos os participantes, que desde onte saben un pouquiño máis sobre a illa na que se atopan!

Bos días a todos e todas!

Onte, martes, tivemos unha xornada do máis interesante! Visitamos as Dyserth Waterfalls, unhas cascadas a tan só un bus de distancia de Prestatyn e Rhyl. Os alumnos, logo das clases, puideron desfrutar dunha tarde de relax na natureza, dando un paseo polo entorno que rodea o seu lugar de residencia e vendo o moito que se parecen as naturezas galesa e galega.

O paseo foi agradable e sinxelo, tanto que algúns estudiantes decidiron investigar un pouco máis aló e descubriron unhas covas escuras que non invitaban, certamente, a pasar da súa entrada. Ademais, demostraron un bo sentido do equilibro tendo que saltar de pedra en pedra para atravesar un río e chegar a un campo que pouco se diferenciaba dos que podemos ver en Galicia.

Ao longo do camiño deixamos atrás Prestatyn e Rhyl, e desde o alto da colina puidemos desfrutar, a pesar da néboa característica, dunha panorámica das dúas vilas estupenda.

Unha xornada así tiñamos que terminala repoñendo enerxías, así que ao final da ruta fomos directos a un pub a pedirnos coca colas, tés e chocolates para todos! Unha recompensa máis que merecida para encarar o ecuador da semana con enerxía. Hoxe, máis e mellor!

Bo día a todos e a todas!

Como empezastes a semana? Os rapaces de Prestatyn cunha maña de instituto, coma sempre, e cunha tarde na que realizaron unha actividade na que parece que desfrutaron un montón! Tiveron un taller de teatro, nada máis e nada menos! Logo de chegar á bolera de Prestatyn, coñeceron a Rob e a Julie, os dous monitores locais encargados da actividade, e da súa man divertíronse mentras exercitaban os músculos e a imaxinación e xogaban a diferentes xogos. Deixáronos pasmados co nivel de inglés e coa maña da que fixeron gala para levar a cabo todas as dinámicas propostas. Parece que, ademais de alumnos aventaxados nos idiomas, os estudiantes galegos de intercambio en Prestatyn teñen madeira de actores e actrices!

Na foto podedes ver o ben que escenificaron algúns dos alumnos un barco e un tanque de guerra respectivamente. Que ben compenetrados están, e que ben traballaron en grupo!

As súas dotes interpretativas mostráronas ao ter que representar,en tres grupos distintos, tres situacións cotiás pero a cámara lenta. Nas fotos, podedes ver o en serio que tomaron as escenas. Ata houbo unha pequena parte musical nunha delas!

Foi unha tarde relaxada e divertida, como debe ser para o comezo dunha segunda semana na que os alumnos están xa completamente adaptados e saben desenvolverse por Prestatyn sen ningún tipo de problema!