Ola, familias!

Benvidos á penúltima entrada do blog, na que vos contaremos as novidades deste martes, día 11 de outubro. Hoxe, cando apareceu Amy, parecía Papá Noel, xa que viña cargadiña con 12 bolsas de papel que levaban escritos os nosos nomes. Que había nesas bolsas sorpresa? As nosas creacións do día 07/10, de cando fomo ao Appledore Crafts Cafe (premede no nome do local para acceder á entrada dese día) e coloreamos unhas figuras de cerámica. Pois hoxe, por fin, conseguimos ver cal foi o resultado. Velaquí tedes unhas fotos coas nosas obras de arte: rás, avións, delfíns, renos, mouchos, elefantes, bolboretas, peixes, xoaniñas.

Algúns de nós levaremos as nosas obras de arte connosco de volta a Vigo; outros, darémosllas ás nosas familias anfitrionas a modo de agasallo, para agradecerlles a amabilidade coa que nos trataron ao longo destas 3 semanas.

Aínda que nos imos ver mañá, hoxe foi a despedida oficial dos nosos compañeiros ingleses. Para iso, reunímonos todos na aula de español, comemos xuntos os nosos packed lunch e probamos a tortilla rechea que cociñou a nosa monitora española.

Antes de irnos a Barnstaple, participamos nunha dinámica de despedida que consistiu en escribir mensaxes positivas para dar as grazas e decir adeus aos nosos buddies. Foi unha boa oportunidade para plasmar por escrito as nosas emocións e deixar un breve texto de recordo neste país de acollida.

As despedidas sempre son emotivas, pero o feito de vernos mañá facilita este proceso. Aquí podedes ver unha foto de todos nós. Unha foto que pode pasar á eternidade:

Despois de moito insistir, convencemos ás monitoras para poder gozar de máis tempo libre en Barnstaple para celebrar unha cea de despedida dos nosos buddies. Fomos todos ao Pizza Hut e aquí podedes ver unha das fotos da cea:

Foi unha velada moi agradable, que compartimos con xente marabillosa e na que houbo algunha que outra bágoa.

O mércores será o derradeiro día de clase. Non queremos que esto remate, que alguén lle diga ao alcalde que queremos ampliar a estancia! Por se non logrades convencelo, imos pechando as maletas e intentaremos descansar moito esta noite… 🙂

Deica mañá!

Ola familias!!

Xa é oficial, comezaron os derradeiros días desta experiencia. En aproximadamente 72 horas botaremos o peche. A palabra “final” levita ao noso redor, axexante, agardando o momento para facer a súa aparición triunfal. Desde o horizonte comeza a chegar un cheiro a saudade e volta á rutina, pero tamén comeza a aparecer un recendo a reto conseguido, a desenvolvemento persoal, a mentes abertas.

Aproveitamos este luns para facer un plan relaxado: fomos ao cine en Barnstaple. Fomos ver a película de “Miss Peregrine’s Home for Peculiar Children”, que xa se está a emitir nos nosos cines galegos en español. Aquí podédesnos ver unha foto dentro da sala, cegados polo flash da cámara.

Hoxe é o día de empezar a facer as maletas. Debemos ir metendo toda a nosa roupa e tamén todos os souvenirs que compramos. Cruzamos os dedos para non exceder os 23 quilos que permite levar a compañía aérea e por recordar meter tódolos líquidos na maleta facturada.

Aída, Enrique, Vanja, Antía, Iván, Carla, Sergio, Claudia, Pepe, Julia, Yeray e Nerea. Doce nomes, doce participantes, doce compañeiros. Doce persoas marabillosas que teñen moitísimo que ofrecerlle ao mundo. Están en plena fase de formación, definindo as súas personalidades, medrando, facendo o seu propio camiño.

Rapaces, rapazas, aproveitade cada un destes derradeiros días ao máximo, cada hora e cada minuto. Probade todos aqueles pratos típicos que non hai en España e aos que aínda non vos atrevestes a botarlle o dente. Non paredes de falar en inglés e, sobre todo, non deixedes de pasalo ben.

Volvemos mañá con máis información sobre o penúltimo día. Ata logo!

Ahoy!

As nove da mañá poñemos rumbo a Ilfracombe!! Trátase dunha vila do norte de Devon, a rexión na que nos atopamos. Como dato curioso direivos que esta cidade é considerada o mellor destino de vacacións de verán para os inleses dentro do seu país, desde a época victoriana ata o día de hoxe.

A liña da costa está chea de acantilados e praias que, sen dúbida, lucirían máis nun día soleado. Nada máis chegar, percorremos o paseo marítimo e puidemos contemplar as vertixinosas paisaxes. Amy explicounos algúns datos curiosos sobre esta zona, como o feito de que durante a época victoriana, debido á prohibición de que homes e mulleres compartisen o mesmo espazo de baño nas praias, os traballadores de Ilfracombe cavaron túneles nos acantilados para permitir o acceso a pequenas calas, para que a xente, segregada por sexos, puidera gozar do mar na intimidade.

Outro dos datos curiosos sobre Ilfracombe é esta estatua de 20 metros de altura, que leva na vila só desde 2012. Trátase da figura dunha muller espida que se ergue sobre unha base composta por unha morea de libros, que conteñen leis e información sobre dereitos. Verity, que é como se chama a obra de Damien Hirst, sostén unha espada na man esquerda, que podería simbolizar o seu poder, e unha balanza da xustiza na man dereita. É curioso o feito de que un dos seus perfís  da estatua amósanos o seu corpo sen pel, polo que vemos o seu interior, as súas entrañas, os músculos, osos, e ata o feto que leva no seu ventre. En teoría esta estatua é unha alegoría da verdade e a xustiza, pero o certo é o autor deixou a porta aberta a múltiples interpretacións. Como podedes imaxinar, a súa presenza na vila foi motivo de controversia e provocou unha división de opinións entre os veciños deste concello do norte de Devon: bonita ou desagradable? Reclamo turístico ou esperpento que vai espantar tanto a turistas como a veciños? A polémica está servida.

Fixemos una photo hunt, unha competición por equipos na que tivemos que sacar as mellores fotos pola cidade, seguindo as normas que marcaba un listado que nos deron. O resultado foi moi divertido e destacou pola creatividade das respostas. Logo, antes de comer, fomos a facer unha ruta en barco. O capitán foinos explicando todo o que podiamos ver desde a borda. Aquí vos deixo algunha foto:

Tivemos tempo libre para explorar e, despois, regresamos á casa coas nosas familias. Mañá é o último domingo en familia. A ver que plan nos teñen preparado.

Deica logo, familias!!

Ola de novo, familias!

Venres, día de creatividade e manualidades na vila costeira de Appledore. Esta tarde, tralo xantar, collemos un bus ata Appledore, que está verdadeiramente preto de Bideford. Alí, camiñamos ata un Crafts Cafe, a cafetería dunha organización sen ánimo de lucro, que destina os cartos recaudados coa súa actividade a realizar donacións a distintas causas.

É fermoso poder formar parte dunha actividade tan útil para a sociedade. Neste lugar, ademais de ter unha tenda de artigos de segunda man, hai unha cafetería e un obradoiro para realizar manualidades, como pintar e adornar figuras de cerámica. Isto último é o que fixemos nós. Pintamos as figuras que nós mesmos escollemos e que, probablemente regalaremos ás familias anfitrionas como agradecemento polo ben que nos están tratando. Ademais, non andamos moi sobrados de espazo nas maletas… 🙂

Ata o martes non veremos o resultado das nosas obras de arte, porque lles van dar unha capa de verniz e vannas pasar polo forno. Prometo actualizar esta información o próximo martes con fotografías do resultado final! Agora déixovos cunhas fotos de todos en pleno apoxeo de inspiración.

Despois desta actividade, tivemos tempo libre por esta fermosa vila mariñeira. Aínda que non ten moitas tendas, as súas rúas parecen tiradas directamente dun libro, polo que merece a pena dar un paseo por elas e intentar perderse, comer un xeado tradicional…

E así rematou o día de hoxe, mañá toca excursión a Ilfracombe. A ver que nos depara a viaxe. Xa vos contaremos o que nos parece!

Deica mañá!!

Podéis ver todas las fotos en la galería de imágenes de Newlink.

Ola a todos, familias!

Este xoves foi un da moi especial, diría incluso que foi un dos máis completos. Aínda que,  pensándoo mellor, para ser sinceros, é complicadísimo elexir só un bo día tendo en conta a gran cantidade de actividades e excursións que facemos, moitas máis ca noutros destinos… Pensemos en Exmouth, Exeter, Appledore, Instow, Barnstaple, Bideford, Atlantic Village e en Ilfracombe, a onde iremos o próximo sábado. Ademais, non esquezamos o parque de atraccións da Big Sheep, os karts, o minigolf, o Cream Tea, o Laser Tag, o karaoke, os recreativos, a praia, o tempo libro en distintas cidades… Por iso, vou rectificar a primeira frase para afirmar que o día de hoxe, xoves, continúa na liña de días redondos que conforman esta experiencia de inmersión cultural e lingüística!

Coma sempre, a xornada comezou asistindo a clases desde as 9:00 ata as 12:20. Socioloxía, historia, xeografía, inglés, español, triple ciencia, cociña, cambios de clase, recreo cos nosos compañeiros. O bo das clases de español é que nos ofrecen unha oportunidade única para devolverlle o favor aos nosos buddies. Eles axúdannos a integrarnos no instituto e nesa clase nós podemos axudalos a mellorar as súas notas, corrixindo redaccións, axudándoos coa pronunciacián, etc.

O xantar de hoxe foi diferente. En lugar de comer packed lunch, as monitoras leváronnos a un local de Fish and Chips! Para os que non o sepan, trátase dun prato tradicional nas islas Británicas que consiste en filetes de pescado rebozados nunha mestura de ingredientes específicos, acompañados con patacas fritas. Xeralmente, os ingleses bótanlle vinagre de malta ás patacas, pero nós preferimos a maionesa e o kepchup de toda a vida…

Tras este menú suculento, fomos a Barnstaple para gozar dunhas horas de tempo libre. Pero antes, participamos nun concurso que nos propuxeron as monitoras. Fixemos unha cadea de favores. Comezamos todos cun bolígrafo e o obxectivo do xogo consistía en falar coa xente que atoparamos pola rúa para intercambiar o noso bolígrafo por algún outro obxecto. Os vencedores serían aqueles que conseguisen o obxecto de maior valor. A verdade é que todos nos implicamos moito coa dinámica e conseguimos resultados sorprendentes. Aquí podedes ver algunhas fotos que proban tque hai xente amable en todas partes:

Fomos cear á casa, coas nosas familias, e ás 19:30 quedamos no Fremington Parish Hall. Tamén asistiron algúns dos nosos buddies! Aí comezaba a noite de xogos, a segunda Games Evening! Por segunda vez, xogamos, corremos, competimos e pasámolo ben. Aquí vos deixo algunhas das fotos que se sacaron durante a velada:

Os finalistas do xogo das sillas musicais

E o broche para un día como hoxe non podía ser outro ca unha sorpresa para as dúas compañeiras que estarán de aniversario durante a estancia en Bideford. Moitísimas felicidades, Nerea e Carla! Esperamos que gozarades da sorpresa e dos vosos días especiais. Todos comemos brownie de chocolate e uns pasteis que preparou unha das familias. Nesta foto podémolas ver cos seus cupcakes de chocolate e unhas postais firmadas por todos que servirán de souvenir da experiencia.

Outro día máis que remata e unha conta atrás que comeza. Só queda unha semana, xa que o próximo xoves poremos rumbo á casa!

Unha aperta, familias!

Podéis ver todas las fotos en la galería de imágenes de Newlink.

Ola de novo, familias!

Hoxe toca facer deporte na praia de Westward Ho! As Beach Olympics! Esta vez teremos sorte co tempo, xa que poderemos ver este rincón máxico nun día soleado, non como a última vez que viñemos, que nos pillou a choiva polo camiño.

A praia ata a que chegamos camiñando por enriba dunha morea de cantos rodados resalta polo enorme e plana que é e pola pouca inclinación que ten. Debido ás súas características, coa preamar é case imposible ver nin tan sequera un metro da area da praia, xa que as ondas baten con enerxía na barreira de cantos rodados pola que camiñamos. Porén, cando a marea está baixa, déixanos un amplísimo espazo para xogar, pasear, gozar dun baño e de fermosísimas paisaxes como as que podedes ver nas fotos seguintes.

Durante a tarde de hoxe corremos, bateamos, construímos, xogamos e divertímonos. Fixemos unha competición de montañas rusas. A proba consistía en deseñar e modelar a mellor montaña rusa de area para unha pelota de pimpón, traballando en pequenos equipos. Para declarar cal sería o equipo gañador, as xuízas tiveron en conta aspectos como a seguridade (a bola non podía saír disparada), o funcionamento (a bola debía chegar ata a fin do percorrido), a dificultade técnica (porque non é o mesmo un percorrido en liña recta que incluír reviravoltas) e a beleza (canto máis bonito mellor).

Para outra das probas destas olimpíadas na praira, Amy aprendeunos as regras dun xogo típico moi popular entre a xuventude inglesa. O nome do xogo é rounders. O xogo é parecido ao béisbol, xa que hai que batear e conseguir dar unha volta ao campo.

Comprendemos rapidamente o funcionamento do xogo e participamos todos. En xeral, déusenos ben e puxémoslle ganas, pero non se pode omitir a realidade neste punto, xa que un equipo foi o clarísimo vencedor, cun marcador  de 10 a 46. Estratexia? Sorte? Se cadra hai que xogar a revancha para responder a esas preguntas…

Antes de regresar ás nosas casas, tivemos algo de tempo libre en Westward Ho! Alí, algúns de nos quixemos probar os típicos xeados da zona, xogar nos recreativos, pasear polas rúas principais… Tamén hai que dicir que nos atopamos cun dos nosos buddies que tamén aproveitara o bo tempo para ir á praia, estaba practicando surf. Menuda casualidade!

Foi un bo día, pero isto aínda non remata aquí. Mañá máis e mellor. Temos que exprimir os poucos días que nos quedan para gozar desta experiencia.

Unha aperta enorme, familias! Podéis ver todas las fotos en la galería de imágenes de Newlink 🙂

Ola a todos!

Martes día catro, dentro de pouco comezará a conta atrás… Pero polo de agora, só queremos pensar en divertirnos e exprimir os días ao máximo. Hoxe, ao rematar de xantar, achegámonos ata o Burton Art Gallery and Museum, en Bideford, onde puidemos comtemplar obras de arte, coñecer a cultura local e xogar a un entretido xogo no museo.

Pero a mellor parte da tarde esperábanos en Barnstaple, xa que tiñamos reservada unha sesión de laser tag!!!! Desafortunadamente, non temos fotos do momento, xa que non se podían facer, pero o que conta é o recordo que levaremos connosco. Para os que non saibades en que consiste ese xogo, consiste nun combate entre dous equipos, armados con pistolas que funcionan con infravermellos, nunha sala con obstáculos e luces de cores.Ademais, algúns de nós tamén quixemos cantar no karaoke, bailar nas máquinas recreativas, xogar ao billar, ao futbolín…

Foi un día redondo, con actividades culturais e moita diversión. A ver que nos espera o día de mañá. Parece que vai facer bo tempo e que, por iso, aproveitaremos para ir a practicar xogos na praia.

Deica mañá, familias!

Ola familias!

Cartel do parque

Esta semana non podería ter comezado de mellor maneira! Resulta que a tan só 20 minutos andando desde o instituto, hay un parque de atraccións no que a granxa é o tema principal. Chámase Big Sheep, que se podería traducir como “Gran ovella”. Se premedes aquí poderedes acceder á páxina web do parque.

A ida fixémola en autobús, para aproveitar o tempo ao máximo. Estivemos alí desde que rematamos de comer ata as 17:00. Toda unha tarde de acción, adrenalina e animáis domésticos adorables: ovellas, coellos, porquiños, cordeiros, cabras…

A verdade é que nos pareceu que é unha boa forma de combinar a riqueza cultural da zona, cun espazo de entretemento para toda a familia. No parque puidemos gozar de atraccións como as que se ven nas fotos e algunhas máis, ademais de espectáculos nos que participaban as ovellas, como unha carreira de ovellas!

Lembrade que na Galería de fotos  podedes acceder a máis fotografías das actividades que realizamos. As que publicamos no blog son só para ir abrindo boca…

Reunímonos para volver ás nosas casas e, esta vez, fomos no coche de San Fernando ata a parada do bus de Bideford Quay, a que collemos tódolos días. Un agradable paseo de 20 minutos pola natureza. Aínda que, non quero mentir, algúns dos estudantes estaban bastante cansados despois dunha xornada tan intensa.

A ver que nos espera o mércores xa que, aparentemente fará tamén bo día e vai haber un cambio de plans. Cal será o plan misterioso?

Ata logo, familias!!

Ola familias!

Este sábado tivo lugar a nosa segunda excursión longa. Como xa sabedes, durante a semana hai certos días que facemos pequenas saídas nas que nos achegamos pola tarde ata poboacións veciñas, como Appledore, Instow, Barnstaple… Porén, os sábados facemos excursións que duran todo o día. Hoxe fomos a Exmouth, unha cidade ao sur de Devon que é bastante grande en comparación coas demáis vilas da rexión.

Debido a obras na vía do tren, tivemos que dividir en dous tramos o traxecto: primeiro collimos o bus e, despois, en tren ata o noso destino.

Espertar cedo na fin de semana debería estar prohibido.

Vanja cos primeros dinosauros que vimos.

Exmouth é unha fermosa cidade costeira con varias atraccións turísticas. Actualmente, hai unha exposición de dinosauros pola cidade. Como é normal, lembrounos ao noso querido Dinoseto. En total, aquí había 33 dinosauros de distintas especies agochados polos principais espazos de Exmouth: parques, prazas, praias, árbores, etc. Nós non logramos atopalos todos, pero aínda fomos quen de ver uns poucos.

Unha nube gris ameazaba a nosa mañá pero, por sorte, só sufrimos cinco minutos de chuvia intensa e o resto do día tivemos un tempo soleado (aínda que algo ventoso ao lado da praia).

Todos xuntos fronte a praia

Antes de comer, fixemos un último esforzo, camiñamos polo paseo marítimo e subimos ata os acantilados que forman parte da Costa Xurásica, declarada Patrimonio da Humanidade pola Unesco en 2001. Estamos a falar dun total de 153 km  de formacións rochosas, nas que se atopan fósiles que nos contan a historia do lugar remontándonos ata 185 millóns de anos atrás.

Aproveitamos as fermosísimas vistas para facer moitísimas fotos. Compartirei nesta entrada algunhas delas, pero lembrade que podedes acceder ao álbum completo na carpeta de Flickr de Newlink.

Pepe, Yeray e Sergio

Julia

Antía

Logo diso, comimos o noso packed lunch e puxemos rumbo ao centro para xogar a unha Scavenger Hunt e conseguir tempo libre. Canto antes rematásemos o xogo, antes poderiamos gozar do noso tempo libre pola cidade. Aquí podedes ver ao grupo gañador, composto por Carla, Nerea e Julia. O seu premio foi unha bolsa de doces e unha hora e media de tempo libre.

A verdade é que tódolos grupos  participaron de maneira activa e ofreceron respostas creativas. A proba consistía en sacarse selfies en distintos puntos da cidade. Aquí podedes ver ao segundo grupo en rematar, formado pos Aida, Vanja, Antía e Claudia.

Foi un día entretido no que seguimos descubrindo a rexión onde vivimos esta experiencia da que xa levamos gozando 10 días. Mañá toca descansar moito e facer plans coas nosas respectivas familias. A ver que nos teñen preparado! Podéis ver todas las fotos en la galería de imágenes de Newlink.

Deica mañá a todos!!

Ola de novo, familias!

Por fin venres, o último día de clases da semana. O máis común sería que estivesemos como tolos ante a idea de non ter que asistir a clase, pero a verdade é que aquí ir ao instituto non é como na casa… Gústanos pasar tempo cos nosos buddies e a rutina de ir ao Bideford College, un lugar con espazos cómodos para relacionarse con estudantes locais e onde nos sentimos moi ben recibidos tanto polos compañeiros como polos profesores e demais persoal que traballa aquí. A continuación podedes ver unha foto da ampla e moderna biblioteca do centro, con ordenadores, sillóns modulares e infinidade de libros e revistas interesantes e actualizados.

Despois de comer os nosos packed lunch, collemos un autobús e puxemos rumbo á Atlantic Village. Trátase dunha área principalmente comercial que se atopa moi preto de Bideford. De novo, conseguimos que as monitoras nos deran algo de tempo libre para descubrir pola nosa conta a zona. Moitos de nós xogamos ao tenis de mesa, outros fomos de compras ou a visitar as distintas tendas do centro comercial.

Logo diso, regresamos a Bideford e puidemos explorar por esta cidade. Se vos parades a pensar, en Bideford imos ao instituto, pero polo de agora nunca pasearamos nin un ratiño polas súas rúas, poola súa ponte, nin tiveramos tempo para visitar a súa igrexa:

Despois de coñecer a cidade onde está a nosa base principal, regresamos á casa para cear coas nosas familias e descansar para o día seguinte.

Xa volveremos con máis novas mañá, familias. Deica mañá!